المغربية

عدَّى النهار و المغربية وراه

و عشان نشوف الفجر من بعديها

هنعدِّي بحور من المأساة

هنشوف حاجات متانقضة بين بعضيها

و صوت قلوبنا مش ناسياه

و عشان نشوف الفجر جوه عنينا

هندوس في ضلمة و موت و حياة

و دموع حزينة بسمتنا بتخبيها

و قلوب كتير و ألف واحد تاه

عدَّى النهار واخد معاه الأشواق

سايب حنين و دمع ميت مشتاق

و صوتنا ينده... مايسمعهوش

عدَّى النهار واخد سكاتنا معاه

في المغربية لون حريقة بيترسم

عالمشربية و زخرفتها بتبتسم

بيقوللنا عالليل و جرحه

و إزاي في حزنه متداري فرحه

و إزاي في حضنه بنلاقي شوقنا

و إزاي قلوبنا بتستناه

و ييجي تاني نفس النهار

ما بين ألوان شعاع النار

و تيجي بعده المغربية

و تاني ندور كلنا وياه

المعنى مش في بطن الشاعر

فتحت باب قلبي اللي داب

لقيت عذاب

و سنين عتاب

لقيت مشاعرمتبعترة

لقيت سحاب

بعدين تراب

و حاجات بتوجع من غير حساب

لقيت حيطان ورا كل باب

و دمعة تنزل م القلب حلوة

تبل ريق اللي مرة خاب

لقيت حاجات في الضلمة عايشة

خفاش معشش على الأسباب

طير صغير لكن مكشر

و كاشف سلاحه و ألف ناب

ورود جميلة مليانة شوك

ولد صغير و شعره شاب

كان حلمه دايماً: نفسه يكون

و يحس بحاجات ماحدش عارفها

و يفتح لقلبه طريق في الكون

فتحت تاني لقلبي تاني

لقيت سنين عمّال بعاني

سامع كلامي من غير معاني

لقيت بيوتي متكسرة

و أبواب كتيرة قدام عنيّا

خايف أخش من أي باب

خايف أطلع فوق السحاب

و ألاقي أصلاً كله سراب

وطن

يعني إيه كلمة وطن

كلمة وطن كلمة بحبِّك

فيها وشوش عايشة المحن

فيها القهاوي واللي ناوي

يقعد في شغله ياخد رشاوي

فيها اللي غاوي يقول حكاوي

فيها اللي ماشي بالمسطرة

و ناس كبيرة صغيَّرة

فيها القلوب الطيبة

و حاجات كتيرة قريبة

فيها الجناين و الكماين

و اللي قلبه غادر و خاين

فيها اللي فات لا عمره مات

و لا عمره خان الذكريات

فيها الحبيب أحسن طبيب

و أي كلمة تمس جرحك

لازم يطيب

فيها الإيدين تمسك في إيدك

في وقت زنقة و في وقت عيدك

فيها اللي رايق و اللي بايخ

و اللي في وسط الزحمة دايخ

فيها الناس بتقول يا ريت

و صوت الأدان لازم بيوصل

لكل حارة و كل بيت

فيها الحبايب و قلب دايب

فيها اللي غايب من سنين

فيها الكلام فيها السكوت

فيها القلوب زي الياقوت

فيها البشر زي الحجر

فيها الشمس ويا القمر

فيها الحروف فيها المعاني

و حاجات كتير مالهاش معاني

فيها إحساس غريب بالزمن

فيها إحساس جميل اتسجن

هي دي كلمة وطن

حكاوي في ليل غريب

بتختلف الوشوش

و كل يوم حاجات جديدة

إمشي الحواري

و اسمع حكاوي

يمكن جداً هناك تلاقي

ناس كتيرة

قاعدين بساطى عالحصيرة

روح و شوف في حتة تانية

ناس كتيرة مش هيّ هيّ

ناس و كله عنده قصة

و ميت حكاية مالهاش نهاية

كل حتة و فيها ناس

كل واحد ماشي في حاله

أو مش في حاله

مالكش دعوة.. مالك و ماله

يمكن ساكت لأنه ساكت

أو دنيته مش مرتحاله

خللي الحكاوي تاخدك بعيد

لمكان جديد

يمكن تلاقي قلوب حديد

و إيدين تدوّر على أي إيد

إعرف ساعتها و اسمع بقلبك

الدنيا دي يدوب أحلام

و كل الناس عايشينها كدة

قلوب مش متأكدة

مش حاسة برضا

و كله بعد الأوان ما يفوت

و يا دوب قبل الصباح ما يفوت

بتيجي لحظة ماليها سكوت

فبها الحقيقة كلها

من غير تزويق أو منجَهَه

فيها الحقيقة كلها

و الناس تداري وشها

فيها الحقيقة كلها

و عنين تزغلل من الدموع

و فجأة تبكي من نفسها

سكوت

في وسط سكوت...
ما بين الليل...
و لما الشجر بيحاول يطلع صوت
و ايدين تمد و تقفل الشبابيك
تداري جوه منها قلوب بتموت
و يمشي هو وسط طريق...
ماليه الضيق...
في وسط سكوت
و وسط الليل
يجيه و جه طفل برئ
ببسمة حلوة و قلب مضئ
ويمسح دمعته في سكوت
و وسط الليل
في عز الصمت
تلاقي ناس بتكتب حروف من نور
عينيهاتصحى لما الصباح بيفوت
و يلقى الطفل من تاني
و يجري عليه و يندهله
و مع إنه ساير على مهله ما يلحقهوش
و يمشي تاني في وسط الليل
تطارده و حوش
يطارده الوقت لما الناس كانوا ما بيحسوش
و ينده اسمه من تاني
يجيلو بس صوت الصوت
و يرجع تاني يعيش في سكوت
كانه لسة زي زمان
يا عيني بين الحياة و الموت

بداية و نهاية

زمان كان نفسي أكبر

كان نفسي جداً أبقى كبير

و نفسي أطير

كان نفسي أحب الدنيا أكتر

و أشوف قلوب متلونة

بلون يليق مع الأخضر

و لاقيتني باكبر

و الوقت فات

فاضل ساعات

فاضل ثواني

كبرت تاني

ما فاضلش تاني عشان أعيش

عدت سنين

و الوقت ماشي ماستنَّنِيش

فاتت حاجات

و ذكريات

عاشت و ماتت حاجات كتير

و اتغيرت حاجات كتير

و كأن أصل الدنيا التغيير

و الدنيا صغرت

و كبرت أنا

كأن عدت مليون سنة

و كان اللي كان

و لا عادش فيه حتى زمان

كل حاجة

لسة الطابور طويل

واقفين فيه كلنا

بس عقبال ما نوصل هناك

نتعرف على بعضنا

أهلاً و سهلاً... أنا الإنسان

أنا الشعب الغلبان

أنا هنا من زمان

و غالباً هموت هنا

أنا الأمنية

و لحن الغربة في الأغنية

أنا ذكريات من زمان

و أنا المرجيحة

طعم الصبا و حاجات مريحة

أنا الفانوس في رمضان

أنا موضوع اترسم مبوظاه الألوان

أنا كل الناس

و أنا الإحساس

أنا السر و أنا الترباس

أنا إيد بِتِدفَى على دخان من المدخنة

أنا الحاجات الممكنة

و قلوب الناس المؤمنة

أنا العيشة و المعيشة

و اللي اتكتب بطرف الريشة

أنا الذل و المسكنة

و الحروف المتلخفنة

و حق ضايع من زمان

كأنه من ستين سنة

أنا المفتاح

و نفسي أرتاح

و لسة الطابور طويل

بس أنا صوتي راح

حكايتنا

إيه الحكاية

إمتى بَدِت صفحاتها..

و إزاي هتبقى النهاية

إمتى هنتعب منها و يصرخ الكون كفاية

كِبِر الزمن و الناس و لسة أنا جوايا

شايف حطام من نفسي بين حطام المرايا

بين حواري المحن و بين شوارع أسايا

في ساحة المعركة في وش كل الشظايا

لقيتني هناك أنا.. و لقيت هناك منتهايا

سايب ورايا سنين كتير.. سايب حبي و منايا

شايل في عيني الدموع.. و الأعظم كان في الخفايا

دموع على خد القمر

لسة فاكر صوت خيالك
و بسمة منك حلوة طالعة
و صوت حكالي ألف قصة
بتداريهم ألف دمعة
لسة حاسس نور عينيكي
و دنيا تانية باعيشها فيكي
و ألاقي ضحكة بتعلا بيكي
و رغم نورك و بسمة منك
لسة شايف دمعتك
ماتعيطيش لو ليكي خاطر
لو بينك و بيني سور
لو بينا سنين مخاطر
إندهي إسمي تلاقيني
بين إيديكي و ليكي طوع
و ليكي قلب و ليكي حضن
و ليكي خد وقت الدموع
طلعي الضحكة البريئة
خللي روحك فيها تظهر
و فيها ورينا الحقيقة
طيري ويا الكون براحتك
ما تسأليش أخبارنا إيه
عيشي في الأفراح لوحدك
أو معانا أو بغيرنا
المهم تبان غلاوتك
المهم يجف دمعك
و تلاقي حتة فيها قلبك
فيها حقك م الحنان
فيها حد يخاف عليكي
و ياخد ضوء القمر
و يمسح دموع عنيكي
و تكوني زي ما إنتِ.. إنتِ
و تلاقي جنة حزاء دموعك
و تسكني ف قلبي و مدينتي

لا تنكسر

لا تبكي وسط الناس

داري قلبك و الإحساس

لا تنكسر

و لا تنقهر

و لا تكون للضعف مداس

خللي الدمعة جوه العين

لا تخلليها تشق طريقها

أو تفتحلك باب لحنين

لا تنطوي

خلليك قوي

خلليك دايماً في العايشين

و امسك و اشكُم و احكم روحك

داوي بصبرك كل جروحك

و وسط الزحمة لا تنهار

أو تستنى ييجي نهار

ممكن ييجي أو مايجيش

ممكن ضلمة فيها نعيش

ممكن تخسر.. ممكن تزهق

ممكن تتعب م المشوار

حتى الدنيا لو تنفجر

و إنت ف وِدك لو دمعتك

من فوق خدك راح تنهمر

لا تنكسر

حجَّر عينك و استمر

دا الدنيا دي غابة و احنا غلابة

و إيه جاب كتاكيت جنب ديابة

دا الدنيا دي دم و حرب و ساحة

مافيش للدمع فيها مساحة

مافيهاش عنوان للي انكسر...

لا تنكسر

تلات إربع و نص

سؤال...

ليه حاسس إني غريق؟

مش عارف أعوم.. و بَطَبِّش

و محدش شايف إني غريق

ليه لما الدنيا بتفتح باب

بالاقي سراب؟

ليه كل ما أحاول أكتب

مالاقيش أوراق و لا مكتب؟

مالاقيش حد ف أي حتة

و لا حتة ف أي حاجة

ليه لما أحاول أحب

مالاقيش الحب

مالاقيش في الدنيا شيء يتحب

و أحاول أقوم..

أتكعبل

و أبدأ م الأول..

أستهبل...

و أجري و أصرخ

و أضحك و أبكي...

و أحس إن الدنيا فوق أكتافي..

و أنزل حافي

و أشد لحافي لأجل أنام

طب ليه أحلامي مافيهاش أحلام؟

وليه الناي صوته حزين؟

و مافيش قافية لكلمة مانجة..

غير لحن كمنجه

طب والبنزين؟

مين هيحطه؟

و سور الحزن...

مين هينطه؟

طب ليه الإحساس؟

و ليه الناس؟

وليه الدم ف طرف الفاس؟

و ليه الأمل؟

و إيه العمل في وجع الراس؟

و إيه الكلمات؟

و إيه الأشعار؟

و ليه القط بياكل الفار؟

و مين هيموت و مين هايعيش؟

و مين راح ياكل جبنة و عيش؟

و أنا لو مُت مين راح يبكي؟

أو لو عِشت مين راح يشكي؟

و مين بيصدق أي كلام؟

و مين طب عايش في الأوهام؟

و إيه البدلة و الجلباب؟

و ليه العلم مش ف كتاب؟

و ليه إللي قُلته..

و بدمعي كتبته..

مالهوش عند حد أي جوابــــــــــــــــــــــــــــــــــــــــ...

عاشق

ثوبها أبيضٌ و قلبها ألوان

أهلاً بها هنا في ملحمة الألحان

في صراعٍ يقتلني كل يوم

و يسلبني الأمان...

هل أحبها؟

أم أعشقها؟

أم أنني ولهان؟

أم أني قد ذبت سريعاً

و وقعت أسيراً

في سجن بلا قضبان؟

أشتاق إليها..

عجباً شوق المسجون إلى السجان

هي قلبي

هي روحي

هي ما يعطيني كيان

هي لحن الحب و معناه

هي عين حنان

هي ذكرى أحلى زمان

نورٌ من بين ظلام

و شفاء للأسقام..

أمي يا نور الأيام

يا نشيد العشق الأبدي..

يا بريقاً في الأكوان

عذراً أمي.. فأنا الإنسان

و شِعري محدود بالكلمات..

تخلوه النغمات

ترويه سنين من عشق..

تسقيه النظرات

تسكنه زهور و ورود..

و وقار ليس بمحدود

فعذراً إليكِ.. إقبليه

فلقد وضعت عمري فيه..

جئت و يملأني الرجا..

أن تقرأيني فيه

غصب عني

إذرفي دمعك علينا و لا تواسينا

دمعة على حاجات كتيرة ما باقتش فينا

على أمة ماتت من زمان

بِسهم الإهانة ف قلبها

و ف ضهرها سكِّينة

أمة ما عادتش أمة

عايشة في ظلام الغمة

في وسط عالم ما بيحكموش

و لا حب البشر و لا ذمة

إبكي و خللي الدموع أنهار

من طُهر الفرات للنيل

و لحد ما تلاقي نهار

إبكي بدموع من حروف

بكِّي من دمعِك ألوف... و فكرينا

فكرينا بفلسطين

بدبابات و طيارات

و ناس رصاصاتها من طين

بأرض بتضيع من إيدينا

و عهود قلناها من زمان

إن بلادنا في عنينا

إبكي تاني و إبكي كتير

على طفل داق طعم السعير

على المجزرة

على بيت في شارع بقى مقبرة

خدي من دموعنا و ابكي علينا

أشلاء ولادنا بقت علامة

على باب تاريخ مليون مدينة

في القدس غزة و ف جنين

بغداد و دم الملايين

لبنان و بيروت بتنادينا

من شرق آسيا و لحد سينا

إبكي كمان لكن خلاص

تعب البكا منا خلاص...

أعذرينا

آخر كلام

خلص الكلام.. ماعادش فيه معاني

ما عادتش فيه حروف

تِتقال في الأغاني

ما عادش فيَّ حاجة

يا دوب شوية سذاجة

يا دوب أحلام

يا دوب أوهام

ما عادش فيَّ صحة عشان أنام

و إن صحيت بافتكر

قلوب كتيرة بايعاني

و حاجات كتيرة وجعاني

و ذكريات زمن الورود

بس الورود بتعاني

صدقت شِعري و همستي

و أخدت مِالدنيا حصتي

لقيتها كدبة و خادعاني

أتاري الوشوش وشوش

و ناس في قلوبها وحوش

ما بيحبوش

ما بيحسوش

حتى إللي كان مرة حبيب

و مني قريب

أصبح في غربة.. أصبح غريب

كل الكلام ما فيهوش معاني

مافيهوش نغم و لا فيه شجن

و لا فيه تناغم و لا حب الوطن

و مهما كتبت، كلامي ده فاني

بافكر خلاص.. ماهاكتبش تاني

في حبك يا بهية

في العشق بكون مجنون

كتير باعشق بجد و جنون

و النهاردة أنا حبيت

أغرب حب ف تاريخ الكون

باعشقك من كتر كُرهي ليكي

و برغم العماص ف عنيكي

باعشقك

و باعشق كل حاجة فيكي

بتربطني بيكي علاقة غريبة

سعات بألاقيكي وِحشة

وكتير بتبقِي حبيبة

يا مصر يالي مجنناني

كل حاجة فيكي مخلياني

تايه في سجن حبك

بطريقة مبهدلاني

كل حاجة فيكي حلوة

وِحشة و برضه حلوة

صوت الزعيق و الصويت

في وداني بيبقى غنوة

ماقدَرش أعيش بيكي و من غيرك

أعيش على نقطة من نيلك

وأموت لو كَلت من خيرك

يا مصر يا كلمة فيها الكتير

شاغلة بالي عني

واخدة قلبي مني

و حطاني ف موقف خطير

بحبك يا عجوزة و يا خطيرة

مَلَاك و الساحرة الشريرة

بحبك يا غنية و يا بهية

يا جميلة و يا غبية

يا كل حاجة في الدنيا ديَّة

و محيّراني..

يا ترى هل إنت عقاب..

و لّا من ربي هدِيّة

رسالة

من غير مؤاخذة و من غير عتاب

إسمعني يا خويا و افتحلي باب

أعتذرلك منه

وأكتبلك عليه آه من عذاب

أنا آسف ياخويا من كل قلبي

آسف لأني خُنت حبي

ما عملتش أي حاجة ف شدتك

و لا أي صوت صرخ بقوة لنجدتك

سامحني يا خويا سامحني بجد

سامحني لأني ف أزمتك

كنت زي أي حد

سامحني لأن الكلمة طالعة من جوة

سامحني لأن فيَّ ما عادش فيه قوة

و ماتكتبش الكلام من الخوف

ناقصة و واقعة منه حروف

و أنا ما اختلفتش رغم الظروف

رغم سجنك و الألوف

ما قولتش حتى كلمة حق

ما قولتش وقت الشدة لأ

و مهما قلت و مهما كان

أنا هنا في مكان أمان

أنا هنا و كراستي و القلم

و إنت ما بين حصار و ما بين ألم

واقف زي الجبال بتحميني

بتحمي دمي و أرضي و ديني

و في الختام سامحني يا خويا

مافيش كلام يجيب المعاني

من قلبي لقلبك فيه كلمتين

كلمة شجاعة متلخصة بين ضفتين

وكلمة تانية طالعة مني بالمعزَّة

ليك يا خويا خلف سور الحصار في غزة

أبجد

إكتب و لو حتى حرف

مسير الحرف يبقى كلمة

كلامك ده وقود للهمة

إحكي عن كل الظروف

من غير أي خوف..

إحكي عن أوقات الحروب

عن ناس عايشة جوة الكهوف

ما فيهاش حياة

ما عادتش سامعة و لا بتشوف

كفاية كلام عن السلام

بلاش أوهام

مافيش عالغصن واقف جوزين حمام

و لو حروفك عجِّزت.. إكتب كمان

إبدأ إجري بكلمتك

علِّي بيها همتك

مضى خلاص زمن الوقوف..

فيه وحوش إتحركت وسط الحروف

فيه حاجات إتغيرت رغم الأنوف

و واحدة واحدة..

حروفك هتكتر.. وتبقى ألوف.

خسارة

يا خسارة على حاجات كتيرة

كان نفسي أقولها و ما قولتهاش

و ناس كتيرة ما كلمتهاش

يا خسارة على الأيام..

عدَّت عليّ و ما عشتهاش

و فات الأوان..

كل واحد راح لحاله

ما كان من زمان..

يا قلبي تعترف

و تقول من زمان.

تعترف بحبك أو بالأسف

فات الأوان

كان إللي كان

مات إللي مات و عاش إللي عاش

و ف قلبي عاش

كلام كتير كان نفسي أقوله

خسارة يا قلبي كان ليك تطوله..

خسارة يا قلبي كان ليك تعيش

خليك فكرها..

دموع كتيرة ما بتتنسيش

و حروف كتيرة ما قولتهاش

ما تلومش إلا نفسك

ما تلومش إلا قلبك..

خليك فاكرها و متنسهاش

بخير الحمد لله

لسة الورود متفتحة و فيها لون

لسة فيه رمش و جفون

لسة فيه صوت النسيم

لسة فيه إحساس عظيم

لسة فيه حاجات

و ذكريات من اللي فات

لسة فيه حكايات

لسة فيه شمس و قمر

لسة المطر

لسة الناس قلوبها حلوة

لسة غنوة

لسة صوت الديك بيدّن

و حاجات كتيرة حلوة جداً

لسة فيه حياة

و صوت قلوبنا سامعاه

بيقولّنا على بكرة جَي

لسة فيه ضَي

و يقولنا بصوت بشير..

لسة الدنيا فيها خير

ألف سؤال مجنون

أكون أو لا أكون..؟

أعيش و لّا لأ؟

أفضل ساكت و ساير...

ولّا أقول الحق؟

أنا أبيض و لّا إسود..

ولّا فيّ الف لون...؟

أكون أو لا أكون...

ألف سؤال مجنون

صَحّى قلبي في الليالي..

بكَّى عيني و خلّهالي..

تايهه ف غربة الكون.

أكون أو لا أكون..؟

لسة الدمع جوة العيون؟

و لّا الفرح بقى يتعزف..

على وَتَرِين من قانون

عايش في وسط دوشة...

و لّا راضي بالسكون؟

أكون أو لا أكون..

ألف سؤال مجنون..

ألف سؤال مجنون.